Ciwan Nebî: Li vir hîna sibeh hene!

ORTADOĞU NEWS - 

Ciwan Nebîyî di hevpeyvîna digel Ortadogu Newsê de behsa wateya evîn, ceng û sibehên piştî şevan tê dike.

(Xwendina vê hevpeyvînê nêzîkî 5 deqîqeyan didome.) 

Weke guleyeke te nekuje

Gelekî zehmet in ev roj, çawa derbas dibin?! Me bi ku dibin?! Ev pirs yên herî henteş in bi min re, encama salan e ji ceng û mirina li welatê me û westandineke dirêj, weke ku gihiştibim ber dawiyê. Carnan hest dibim ku gerek e cih biguherim û li der dora xwe dinihêrim, li kolanên ku destê min ji wan nabe, li kesên ku nikarim bêyî wan biçim sibehên xwe (li vir hîna sibeh hene). Gerek e bibêjim. Sibehên ku bi gule û bombeyan dest pê dikin, bimirinê.

Li sînorên girtî li der dora xwe dinihêrim, cîhana ku em dorpêç kirine, bîr dibim ku ez ê bêhinçikiyayî bimînim, vedigerim xwe, hewildana berdewamiyê.

Li vir hîna zarokên birayê min dikenin. Dergehên jiyanê yên li ber min mayî, demeke dirêj bi wan re derbas dikim, vedigerim xwe, vedigerim xwendin û nivîsandinê, gera li kenên daran li ser qeraxên kolanan, li xum-xuma bahozan, dema çîrokên xwe di guhê pelên daran de eşkere dikin

Naxwe dikarim herim kar. Ji xwe re dibêjim, dikarim vegerim malê, li filmekî reş û sipî temaşe bikim, li xwe di neyinikê de, di helbestekê de û şêlûbêla di hundirê xwe de biguhêzim, ber bi rojeke din de ku wê heman bûyerên xwe dubare bike, ez jî heman gotin û kiryaran. 

Kêlîkek

Di nivîsandinê de min, herdem hewil da ku kêlîka xwe binivîsim, kêlîka li der dora xwe û çawa gerek e ku bibe. 

Min li ser hezkirinê nivîsand dema ku min hez dikir, li ser berf û barana ku li paş pencereya min dibariya dema ku êvar hedanên riha bûn, min helbesta cengê nivîsand bi barîna cengê re bi ser bajarên me de, mirina ku bi cengê re dibare. 

Weke guleyeke ku te nekuje. Berhema min a sisiyan e, hemî helbestên wê li ser cengê bûn, guhertinên ku bi cengê re xwe li me girtin, li hûrbîniyên bajar û jiyana me.

Xewna min bû ku vegerim kêlîkeke hezkirinê binivîsim, min di berhema xwe a çaran de hewil da, min çend helbestên hezkirinê nivîsandin, çend helbestên jiyanê, min nikarî bû cenga li der dora me ku kêlîka me li paş xwe bihêlim, îro careke din ber bi helbesteke hezkirinê de diçim, gelek destpêk gerek in ta bi ser bikeve, ber bi pirtûkekê de, bîr dibim, gelek roj û guhertin jî.

Li rojavayê rewşa edebiyat û nemaze helbestê çi ye?

Ciwan Nebî (Wêne: Murat Bayram/Ortaogunews) 

Ev pirs gelekî dibe cihê gengeşeyê, weke mînak em berî çend rojan di hevpeyvînekê de, bi zimanê erebî li ser axivîn, nerînên cîwaz di xwendina rewşa helbesta kurdî de li Rojavayê derdikevin, xwendinên corbicor, di encamê de rewşa helbesta kurdî ne li gor hêviyên xwêneran e, şopandina wê min kêfxweş nake. Gelek helbestvanên kurd pişta xwe dan helbestê, sedemên biryara wan gerek e bibin cihê ger û lêkolînê, gerek e werin çareser kirin. 

Kesên ku nerîneke din pêşkêş dikin em dikarin bi hev re serdana pirtûkxaneya kurdî bikin, pirtûkên helbestan yên ku derdikevin bixwînin û bidin ber pirtûkên salên din, em ê di nerînekê de bigihêjin hev ku weşanên pirtûkxaneya kurdî di helbestê de gelekî kêm in, pêdiviya wan bi lêvegeran hebû berî çapkirinê, bi rexnekirinê ku pişta xwe daye wan. 

Helbesta kurdî li rojavayê Kurdistanê gavên mezin, ber bi avakirina dîmeneke nû de diavêtin, nemaze di destpêka salên aloziya Sûriyê de, ligel destpêka rûbera azadiyê li bajarên kurdî û salên berî wê ku tevgereke helbesteke cîwaz diherikî. 

Ev axaftin me vedigerîne xalên destpêkê, gera li helbestvanên kurd û helbestên wan ku rawestiyan, herwiha me dibe gera li nifşê nû di helbesa kurdî de ku dereng ma di hatina xwe de, di nîşanekê de ku ne bitenê rewşa helbesta kurdî li rojavayê Kurdistanê cihê mixabiniyê ye, siberoja wê jî di metirsiyê de ye. 

Aramî heba

Bi aramiyê pêdiviya min gelekî heye vê demê, bi hedanê, ta ku karî bim careke din vegerim xwe, hêviyên xwe di nivîsandinê de. Ev xewna min e weke ku min got, karî bim helbesta xwe azad bikim ber bi xweşikbûnê de, zimanê helbesta xwe vejînim. Ev xwîn gelekî min mijûl dike, hest dibim ku girêdayî me bi êşê, bi nivîsandina li ser êşê. Îro helbesteke girêdayî dinivîsim, ne bitenê kêlîka min e, ew mijara kêlîkê derbas dike, ber bi xweziyekê de ku jiyan li welatê me vegere, di encamê de helbesta xwe vegerînim û zimanê helbesta xwe ber bi axaftinekê de ku min gelekî bêriya wê kiriye.

--

Hevpeyvîn: Murat Bayram

muratbayram@botaninternational.com 

Anahtar Kelimeler:
Ciwan NebîHelbestkar
Avatar
Adınız
Yorum Gönder
Kalan Karakter:
Yorumunuz onaylanmak üzere yöneticiye iletilmiştir.×
Dikkat! Suç teşkil edecek, yasadışı, tehditkar, rahatsız edici, hakaret ve küfür içeren, aşağılayıcı, küçük düşürücü, kaba, müstehcen, ahlaka aykırı, kişilik haklarına zarar verici ya da benzeri niteliklerde içeriklerden doğan her türlü mali, hukuki, cezai, idari sorumluluk içeriği gönderen Üye/Üyeler’e aittir.